ÇINGIZ BABAYEV. `POZİTİV VƏ YA NEQATİV`BAKU PUBLIC ART FESTIVAL 2013:

30 mart - 13 aprel, 2013

PARK BULVAR

POZİTİV VƏ YA NEQATİV?

Bədii sosial konseptual fəlsəfi layihə.

Xüsusilə BAKU PUBLİC ART 2013 üçün
Müəllif: ÇİNGİZ BABAYEV

30 mart, saat 19:00-da Park Bulvar Ticarət Mərkəzinin birinci mərtəbəsində, rəssam Çingiz Babayevin “POZİTİV VƏ YA NEQATİV” adlanan bədii-sosial layihəsinin təqdimatı keçiriləcəkdir.

Layihə “YARAT!” Müasir İncəsənət Məkanının təşkil etdiyi sayca ikinci “Public Art” festivalının çərçivəsində təqdim ediləcəkdir. Bu il festival ”Participate Public Art Festival” adlanır və adından göründüyü kimi həm müəllifləri, həm də müasir incəsənət pərəstişkarlarını daha aktiv fəaliyyətə çağırır. Proqrama 10 layihə daxildir, bunlardan 5-i xarici ölkələrin iştirakçıları (Rusiya, Gürcüstan, Portuqaliya, Böyük Britaniya və ABŞ) tərəfindən hazırlanmış və həyata keçirilmişdir. Bu il iştirakçıların əksər işləri məna etibarı ilə interaktiv olacaq və tamaşaçını həm fiziki, həm də emosional olaraq cəlb edəcək. Əsas proqramdan əlavə festivala geniş maarifləndirici layihələr də daxil edilmişdir. Festival iştirakçıları mühazirələr, seminarlar və master-klasslar silsiləsini təşkil edəcəklər. Arzu edən hər kəs bu tədbirlərdə iştirak edə biləcək.

POZİTİV VƏ YA NEQATİV?

Hər birimiz gündəlik həyatımızda müsbət və mənfi təəsuratların yerdəyişməsi ilə qarşılaşırıq. Bizim daxili vəziyyətimizə ictimai-siyasi, mədəni və şəxsi həyatımızda baş verən hadisələr təsir edir. Nəzərə çarpmayan mənfi hal milyonlarla insanlara təsir edə və böyük miqdarda neqativ təəsurat yarada bilər. Eyni formada pozitiv əldə edilə bilər, lakin pozitiv vəziyyətə düşmək və bu halı qoruyub saxlamaq, neqativ halın yaranması üçün vasitəçi olmaqdan qat-qat çətindir. Müsbət enerjinin yaranması üçün insanların daxilində ən azından müsbət qığılcım, optimizm, həyata sevgi və inam hissi olmalıdır. Təəsüf olsun ki, son vaxtlar bu hallara çox az rast gəlinir. Mənfi aura isə çox tez yaranır və sürətlə yayılır. Ümumi mənada neqativ ruh, cəmiyyətdə narazılığın yaranmasına gətirib çıxarır. Rəssam Çingiz Babayevin fikrincə, ilk növbədə mənfi enerjinin yarandığı mənbəni tapmaq və bu mənbəni müsbət tərəfə yönəltmək lazımdır. Optimist ruh və həyat sevgisi neqativ abu-havanın aradan qaldırılmasına kömək edə bilər, nəticədə müsbət iqlimi formlaşdırar. Sakinlər arasında əhval-ruhiyyənin necə dəyişdiyini üzə çıxartmaq məqsədi ilə rəssam bədii-sosial konsepsiyalı  sorğu layihəsi hazırlamışdır, harada əsas və yeganə sual aşağıdakı olacaqdır:

“Gündəlik həyatınızda tez-tez qarşılaşdığınız (pozitiv ya neqativ) hallar hansılardır?”

Layihə 30.03.2013 tarixindən 30.04.2013 tarixinə kimi davam edəcəkdir.