Norveçdə yaşayan və fəaliyyət göstərən Kolumbiya əsilli rəssam Pedro Qomes-Eqanya, öz fərdi sərgisi üçün qalereya divarlarının daxilində geniş miqyaslı pavilyon qurmaqla, tamaşaçıya xüsusi multisensorlu, immersiv təsir göstərir. Məkan daxilində məkan kimi qurulan bu əsər, tamaşaçını daim dəyişən mühiti yaşamağa dəvət edir.
Əsər öz ilhamını Xəzər regionu və Norveç səyyahı Tur Heyerdalın fəaliyyətindən götürüb. Məşhur səyyah, öz həyatını Yer kürəsinin ən uzaq məkanları arasında əlaqələrin qurulmasına həsr edib. O, geniş mübahisələrə səbəb olmuş Odinin axtarışında adlı elmi fərziyyəsində müasir skandinaviyalıların bir vaxtlar indiki Azərbaycanda yaşamış insanların törəmələri olduğunu nəzəriyyə şəklinə salmaq məqsədilə Skandinaviya mifologiyasından istifadə etmişdir. Elə Sleypnir sərgisi də öz adını Norveç mifologiyasının tanrısı Odinin səkkizayaqlı atının adından götürüb; bəziləri bunun gəmi və ya qayıq, bəziləri isə əqrəb və ya əqrəbəbənzər həşərat olduğunu iddia edir.
Əsərin performativ ardıcıllığında əsas mətn əlavə olaraq Xorxe Luis Borxesin Alef hekayəsindən ilhamlanıb. Bu hekayə, istənilən şəxsin, istənilən zaman, istənilən bucaqdan Yer kürəsinin hər bir yerini görə biləcəyi obyekti təsvir edir. Burada adaptasiya Qomes-Eqanya hekayəsi ilə tamamlanır. Bu hekayə, bir kişinin öz həyat yoldaşına “əyani qəhrəmanlıq jesti” kimi tikdiyi evdən, sonradan isə əqrəblərin bu evi zəbt etməsindən bəhs edir. Rəssam, öz hekayəsi ilə diqqəti Heyerdalın həyatı və öz həyatı arasında apardığı əlavə paralellərə cəlb edir.
Kvazi-elmi və çox vaxt ziddiyyətli olan macəra və qəhrəmanlıq nağılları dünyamıza nüfuz edir. Həmişə mifoloji və ya texnoloji baxımdan uydurulan dünya, onun coğrafiyasının imkan verə biləcəyindən daha əlaqəlidir. Sleypnir – mümkün olmayan coğrafiyaları “əymək” və “bükmək” üsulları qismində diqqəti özəl və incə məqamlara çəkən “hekayələr torunu” ortaya çıxarır. Bunu etməklə, sərgi, kişi qəhrəmanın heç zaman dəyişməyən obrazını sual altına qoyur və poeziyanı bir tarix ötürücüsü kimi vurğulayır.
Sərgi M.A.P. Festivalının bir hissəsi kimi Bakcell şirkətinin dəstəyi ilə həyata keçirilir.
Xüsusi olaraq Norveç Krallığının Azərbaycandakı səfirliyinə və ILAB MMC-yə öz dərin minnətdarlığımızı bildiririk.